Wainhira reforma desentralizasaun iha prosesu nian laran, munisipius hotu iha Timor-Leste sei hetan liu tan responsabilidade no independensia kona-ba funsaun prestasaun servisu nian no jestaun finansas públikas. Iha kontestu ida ne’e, asesu bá dadus ho kualidade ne’ebé diak maka fundamental tebes atu garante hodi foti desizaun ho faktus ne’ebé tuir realidade lokál. Kuantidade dadus ne’ebé mak importante eziste ona iha Timor-Leste, prodús husi governu, parseirus dezenvolvimentu no sociedade sivíl sira, maibé dadus sira ne’e namkari iha fonte ne’ebé oi-oin no dala barak susar atu hetan asesu. Iha kontestu ida ne’e mak lori identifika katak iha nesesidade atu iha plataforma úniku, amigável no asesivel bá ema hotu-hotu.
Fornesimentu dadus ne’ebé nakloke iha nivel lokál mós fundamental bá partisipasaun no kolaborasaun sidadaun nian iha foti desizaun kona-bá polítika lokál. Ho fornesimentu ne’e loke kanál komunikasaun ida entre governu no sidadaun no permite ema atu laós buka de’it, maibé hataan mós bá polítika ne’ebé implementa husi governu, tantu iha nível sentral no lokál. Portal ida ne’e asesivel bá ema hotu-hotu, inklui sidadaun no sosiedade sivíl, no ho objetivu atu apoia transparénsia no envolvimentu ne’ebé ativu husi sidadaun sira iha foti desizaun lokál.
Portál Munisipál serbí hanesan portal nasionál ida atu buka no monitoriza status dezenvolvimentu nian husi munisípiu 12 hotu no suku sira, bazeia bá indikadór balun ne’ebé hili, kobre sektór ne’ebé inklui Saúde, Edukasaun, Sósiu-ekonómiku, Demografia, Infraestrutura, Jéneru no Agrikultura. Portal ne’e mós dirije bá sidadaun sira no fó informasaun bázika kona-ba munisípiu idak-idak, inklui prestasaun servisu sira no prosedimentu iha nivel munisipál. Ikus mai, Portal Munisipál fó informasaun kona-ba projetu infraestrutura ne’ebé lao hela bá sektór balun, atu fasilita monitorizasaun projetu nian no evita duplikasaun.
Portál ne’e administra husi Ministériu Administratsaun Estatal, ne’ebé mak lidera prosesu desentralizasaun. Hetan apoiu husi PNUD no Uniaun Europeia. Hafoin projetu pilotu rua nebe’e mak la’o ho susesu iha munisípiu Baucau no Bobonaro, deside atu haboot inisiativa iha nível nasionál no harí plataforma dadus ida iha nível referidu. Baze dé dadus dahuluk, halibur ona husi fonte oi-oin, inklui Ministériu, Munisípiu no Parseirus Dezenvolvimentu sira. Maibé, portal ida ne’e dinámiku no sei kontinua boot iha futuru. Prosesu halibur dadus hanesan prosesu ida ne’ebé mak lao daudaun hela, ho atualizasaun ne’ebé regulár ne’ebé mak planu hela iha futuru.